angi o‘quv yili boshlanishiga ham sanoqli kunlar qoldi. O‘quvchilarni zarur darslik va o‘quv qurollari bilan ta’minlash maqsadida tashkil etilgan maktab bozorlari har qachongidan gavjum. 

Qoraqalpog‘iston Respublikasi shahar va tumanlarida ish boshlagan maktab yarmarkalarida yurtimizda ishlab chiqarilgan 26 turdagi o‘quv anjomlari savdosi yo‘lga qo‘yilgan. O‘quv qurollarining sifati, o‘quvchi didi va dunyoqarashiga mos bezatilgani, tanlash imkoniyati kengligi xaridorlarga manzur bo‘lmoqda.

Qoraqalpog‘iston Respublikasi Xalq ta’limi vazirligidan olingan ma’lumotlarga ko‘ra, savdo tashkilotlari, yirik savdo majmualari va dehqon bozorlarida 83, shuningdek, 86 umumta’lim maktabida maktab bozori tashkil etilgan. Ularga 44 savdo tashkiloti biriktirilgan. Joriy o‘quv yilida 703 umumta’lim maktabida tahsil oladigan 254 ming 599 o‘quvchining o‘quv qurollari, maktab formasi va poyabzallarga bo‘lgan ehtiyoji aniqlanib, ular to‘liq ta’minlanmoqda.

Nukus shahridagi “Dehqon bozori” mas’uliyati cheklangan jamiyati hududida ochilgan maktab yarmarkasiga 30 ga yaqin savdo korxonasi va tadbirkor jalb etilib, barcha turdagi o‘quv qurollari, o‘quvchilar formasi, sport kiyimlari, sumka va portfellar taqdim etilgan. Savdo nuqtalarining terminal, nazorat-kassa apparati bilan ta’minlangani xaridorlarga qulaylik tug‘dirmoqda.

www.uza.uz